माझ्या या ओटीवर

माझ्या या ओटीवर
कोण कोण येते-कोण कोण येते?
चिमणी येते नि कावळा येतो,
टपटप दाणे टिपून जातो-टिपून जातो.
होला येतो नि पारवा येतो,
हू हू घू घू करून जातो-करून जातो.
मैना येते नि पोपट येतो,
मंजूळ मंजूळ बोलून जातो-बोलून जातो.
मोर येतो नि लांडोर येते,
थुई थुई थुई थुई नाचून जाते-नाचून जाते.

माझ्या या हौदावर
कोण कोण येते-कोण कोण येते?
चिमणी येते नि कावळा येतो,
बुडबुड गंगे न्हाऊन जातो-न्हाऊन जातो.
होला येतो नि पारवा येतो,
थेंबथेंब पाणी पिऊन जातो-पिऊन जातो.
मैना येते नि पोपट येतो,
पाणी उडवून खेळून जातो-खेळून जातो.
मोर येतो नि लांडोर येते,
थुई थुई थुई थुई नाचून जाते-नाचून जाते.

माझ्या या बागेत
कोण कोण येते-कोण कोण येते?
चिमणी येते नि कावळा येतो,
इकडे तिकडे उडून जातो-उडून जातो.
मैना येते नि पोपट येतो,
पेरू, डाळिंब खाऊन जातो-खाऊन जातो.
मोर येतो नि लांडोर येते,
आंब्याच्या डहाळीवर झुलून जाते-झुलून जाते.
कोकीळ येतो नि बुलबुल येतो,
गोड गोड गाणी गाऊन जातो-गाऊन जातो.

चला शिकूया.-
साभिनय व तालासुरात गीतगायन करणे.
गाण्याचा आनंद घेणे.

मराठी व सेमी माध्यम